Ha'u buras, no lolo ha'u-nia dikin

                                

                   Ha'u buras, no lolo ha'u-nia dikin/tanba ha'u                                                               abut hetan matak-malirin//

TASI-TOLU, AMU PAPA NO HAKILAR LIBERDADE [Nota La’o Rai nian 5]

Ohin, loron 12, fulan-Outubru, iha ita-nia istória, ita marka tinan 29, Saseluk Kristu nian--Amu Papa João Paulo II, sama-ain iha ita-nia rain Timor-Leste.

Iha Tasi-Tolu, Amu Papa selebra misa ba ema lubun. Iha Tasi-Tolu, Amu Papa haklaken liafuan murak no kmanek,

“Imi masin rain nian, no naroman mundu nian.” 

Iha Tasi-Tolu mak foin-sa’e Loriku Assuwa’in sira hakilar liberdade. Sira ema kaer, sira ema futu, sira ema baku, sira ema taka sira-nia ibun. Maibé, sira la tauk. Ba sira, ita hakru’uk, ba sira ita foti ita-nia xapeu.

Tasi-Tolu--fatin lulik, iha momentu ne’ebá, sai foku atensaun mundu nian, tanba Amu Papa nia vizita. Iha Tasi-Tolu mak Amu PaPa haree rasik ho nia matan, rona rasik ho nia tilun, Timoroan nia tanis no halerik.

Tasi-Tolu--fatin lulik, halekar tebes duni fo'er sira ne’ebé subar metin hosi ita-nia funu-maluk sira ba mundu, iha tinan barak nia laran.

Tasi-Tolu, fatin-lulik, fatin istóriku, sempre inspira ita. Tasi-Tolu sempre motiva ita atu refleta, medita no kontempla.

--
Fatuhada, 12 Outubru 2018
@JE/ABS/KM

AMAN NU’UDAR FINI (Nota La’o Rai nian 4)

Fulan-fulan, iha loron 10 ka loron 11, hafoin tiha ha’u-nia Papá mate iha loron 10, no hakoi iha loron 11 fulan-Dezembru tinan 2003, ha’u sempre buka haka’as-an atu mout iha kontemplasaun kona-ba Papá nia esénsia nu’udar aman ida ba ami oan no bein-oan sira, hodi hakerek nota IN MEMORIAM: APÁ SEBASTIÃO MARUBI, no haruka liu SMS ba ha’u-nia bin/alin no sobriñu ka sobriña sira.

Ikus-ikus ne’e, ha’ u buka atu publika ha’u-nia nota oan ne’e liuhosi ha’u-nia konta facebook nia didin-lolon no nia pájina “my notes”, no ha’u-nia blog, no mós haruka liuhosi chatting on-line familiar nian ba bin/alin no sobriñu ka sobriña sira.

Husu boot, nota hirak ne’e bele halibur hamutuk, no publika nu’udar livru oan ida, iha loron ruma.

Aman nia kole ka aman nia kosar-been, ita oan sira sei selu labele, to’o de’it ita fila hikas ba rai-rahun.

Iha kalan ida, bainhira dada-lia kona-ba kultura rai-Timór nian ho ha’u-nia Tia Verónica iha Darwin, Austrália iha tinan 2000 nia laran, maka ha’u aprende liafuan murak kona-ba esénsia sai inan, aman no oan. Iha dada-lia murak ne’e, Tia Verónica hatete,

“Oan, ita-nia aman ne’e nu’udar fini, no ita-nia inan nu’udar rai-bokur, no ita oan sira mak nu’udar dubun sira ne’ebé moris hosi rai bokur ne’e. Oinsa dubun bele mosu, se fini la kari iha rai-bokur nia leten?”

Tia Verónica nu’udar mestra boot ida iha ha’u-nia moris. Husi nia, ha’u aprende buat barak--kona-ba lisan rai Timór nian.
--
Fatuhada, 11 Outubru 2018
@JE/ABS./KM

IN MEMORIAM: APA SEBASTIÃO MARUBI

Apá haktuir, jerasaun sira-nian mai hosi avo feto tolu:

ida mak tuur iha Rembor, kous Amá Eve sira, ida maka tun mai Manatuto--Ili-wa’i, kous Apá sira, no ida seluk mak sa’e ba Laklo, kous Tiu Cabral sira/

Feto tolu nia jerasaun/matak no buras/
Feto tolu nia jerasaun/lolo nia sanak/lolo nia dikin/
Feto tolu nia jerasaun/rani iha fatin-fatin//
--
Fatuhada, 11 Outubru 2018
@JE/ABS/KM

PANORAMA OBRA LITERÁRIA TIMOR-LESTE [Nota La’o Rai nian 3]

Panorama obra literária Timor-Leste, liuliu poezia, furak loos ba ha’u atu observa, ikus-ikus ne’e, liuhosi mídia sosiál: facebook, ho ezisténsia obra poétika eskritór no eskritora sira ne’ebé iha talentu, ne’ebé moris iha dékade 1970, 1980 no 1990, iha lian Tetum.

Prezensa eskritór no eskritora sira-ne’e merese hetan apresiasaun boot.

Sira-nia entusiazmu iha hakerek obra poétika, sunu mós ha’u-nia fuan, neon no klamar atu hakerek no hakerek.

Hamutuk ho sira, ha’u hakarak atu aprende bebeik.

Hamutuk ho sira, ha’u hakarak luku bebeik iha tasi literária ne’ebé klean no luan.
--
Fatuhada, 9 Outubru 2018
@JE/ABS/KM
--

LA FÁSIL ATU HAKI’AK NO EDUKA [Nota La’o Rai nian 2]

Ha’u ho ha’u-nia kaben agradese tebes ba Maromak tanba hetan grasa, bele kous oan na’in rua: mane ida no feto ida.

Ida mane ne’e oras ne’e besik atu halo tinan 12, no ida feto halo tinan 8 ona.

La fásil ba ami atu haki’ak no eduka kosok oan na’in rua ne’e. Loron-loron ha’u tenke aprende oinsá maka atu sai aman di’ak ida ba sira.

Labarik sira nu’udar mestre no mestra ba inan no aman sira. Buat ne’e halo ha’u hanoin saida maka poeta Inglés era Romantismu, William Wordsworth dehan, “The child is the Father of Man”.

Ha’u tenke rekoñese katak ha’u lakon pasiénsia bainhira haree sira nakar.

Iha midar no moruk hotu bainhira akompaña labarik ki’ik oan rua, hodi hakat ba sira-nia otas sai adultu, ha’u sempre mout iha reflesaun: it is worthwhile to become co-creators by being as parents for these two small creatures.
--
Fatuhada, 8 Outubru 2018
@JE/ABS/KM

AIN LE’UT ROHAN-LAEK [Nota La’o Rai nian 1]

Hakerek-na’in koñesidu barak iha mundu, ne’ebé istória toma nota, sofre depresaun mentál durante sira-nia tempu moris. Interesante atu observa sira-nia biografia.

Buat ida-ne’ebé interesante hosi sira-nia biografia maka, sira-nia kreatividade, oituan ka barak, salva tiha ona sira hosi terus moris nian.

Sira rai hela tiha ona ain-le’ut kreatividade, ho kbiit no frakeza tomak.

Sira-nia ain-le’ut ne’e rohan-la’ek. Ita-nia knaar, hanesan lee-na’in, maka la’o tuir ain-le’ut sira-ne’e ho atensaun tomak.
--
Fatuhada, 7 Outubru 2018
@JE/ABS/KM