PENSANDO EN EL WALT WHITMAN

ó hananu ba ó-nia amérika nia rai, tasi no lalehan/
ha'u mós hananu ba ha'u-nia timór nia rai, tasi no lalehan/
ita rua rai ain-le'ut balun/
husu boot ita-nia ain-le'ut sira/hamosu ain-le'ut foun lubuk/
iha tempu ikus mai//
--
Fatuhada, 18 Fevereiru 2018
@JE/ABS/KM

PENSANDO EN EL PABLO NERUDA

"I believe the world is beautiful
and that poetry, like bread, is for everyone."
ROQUE DALTON

ó-nian mak xile, ho nia lalatak/
ha'u-nian mak timor-lorosa'e, ho nia lalatak/
ita rua fanun malu: ó ho ó-nia lian español, no ha'u ho ha'u-nia lian tetum/
ita rua nia dadolin mosu/iha dadeer rai-sabutar no iha lokraik rai-nakaras/
nu'udar jambata/
hatutan horiseik, ohin no loron aban//
--
Fatuhada, 18 Fevereiru 2018
@JE/ABS/KM

PENSANDO EN EL SUTAN TAKDIR ALISAHBANA

“Poetry begins in delight,

And ends in wisdom.”

ROBERT FROST

Ó-nia Sumatra no ha’u-nia Timór/nahe-an iha biti-boot Nusantara/hori uluk no hori otas kedas/molok maluk matan-mutin sira: olanda no portugés/mai sama ita-rua nia bei-ala sira nia ulun/

Ó-nia knananuk, “LAGU PEMACU OMBAK”/hafurin ha’u-nia knananuk, “MENARI MENGELILINGI PLANET BUMI”/

Ita rua tuba-rai/ita rua tebe-rai/ita rua tabu-rai/hodi hananu/ho fuan no laran tomak/”duduk sama rendah, berdiri sama tinggi”//

--

Fatuhada, 18-19 Fevereiru 2018

@JE/ABS/KM

IHA DOMIHUHUN TUTUN, RAI MÓS ATU NAKARAS

     IHA DOMIHUHUN TUTUN, RAI MÓS ATU NAKARAS

Ami halibur hamutuk iha rai atu nakaras, hodi fahe buka’e ema la’o-dalan nian ba malu

Ami mós hakmatek, hamulak

Ami mós hakmatek, harohan

Iha Kornél Santu nian ain-hun, ami mós dada-lia, ami mós futu-lia hamutuk

Atu hatutan lala’ok-moris ami ema la’o-dalan nian

No husik hela ain-le’ut lubuk: ain-le’ut mata-dalan nian

--

Fatuhada, 28-30 Janeiru 2018

@JE/ABS/KM

AMU VIRGÍLIO: BIBI-ATAN DI’AK, BIBI-ATAN MURAK

Ita-Boot mak bibi-atan di’ak, Ita-Boot mak bibi-atan murak

Ita-Boot la baruk, Ita-Boot la kole, iha oin, leno dalan furak             Ita-Boot la baruk, Ita-Boot la kole, iha klaran, fanun ami lubun

Ita-Boot la baruk, Ita-Boot la kole, iha kotuk, dudu ami wa’in

Bibi-atan di’ak, bibi-atan murak, hamutuk iha loron horiseik, iha ita fiar, ita hamulak

Bibi-atan di’ak, bibi-atan murak, hamutuk iha loron ohin, iha ita domin, ita haburas

Bibi-atan di’ak, bibi-atan murak, hamutuk iha loron aban, iha ita hein, ita hamatak

Bibi-atan di’ak, bibi-atan murak, hamutuk ita kadi isin-lolon, halo ita isin-moris

Bibi-atan di’ak, bibi-atan murak, hamutuk ita kadi neon, halo ita neon-na’in

Bibi-atan di’ak, bibi-atan murak, hamutuk ita kadi fuan, halo ita fuan-belar

Bibi-atan di’ak, bibi-atan murak, hamutuk ita kadi klamar, halo ita klamar-moris

Ita mós sei tebe no bidu ho haksolok, iha rai-fehan furak no kmanek

Ita mós sei semo, no semo hadulas rai-klaran, no semo katik, sa’e bá leten aas ba

--

Fatuhada, Dili, Janeiru 2018

@JE/ABS/KM