IN MEMORIAM APA SEBASTIÃO MARUBI

tinan sanulu resin rua ona/ita la haree hetan apa nia isin-lolon/nia memória horik nafatin iha ita-nia leet/haklaken nia morin//

Dili, 10-11 Dezembru 2015

HA’U KLAMAR NIA LALATAK

Ha’u maus, keta kaer metin/keta bobar metin/Ha’u siak, keta hakfodak/ Ha’u makerek, keta doko ulun/keta hola ba lia//

Dili, Agostu 2015

@ JE/ABS/KM

FATUHADA REVISITED 1

Iha sadan oan ne’e nia fohon duni mak iha dadeer-san nakukun de’it ha’u foti-matan hateke fulan nurak no fitun rai sabutar/Ha’u mós hakmatek/ taka liman, hamulak/Ha’u mós nonok, taka liman, harohan//

TL, 1-6-2014—6 -8-2015

 @ JE/ABS/KM

NOTA BA HA'U-NIA AN RASIK [6-1-2016] -- 2

Atu hetan loron-aban nabilan, ha’u tenke hateke no halo hakat ida ba kotuk, hafoin tiha mak ha’u sei tenke halo hakat rua ba oin.

Atambua, Timor Osidentál, 29 Dezembru 2015
@ JE/ABS/KM

NOTA BA HA'U-NIA AN RASIK [6-1-2016]

Inan nia kabun-laran nu’udar bee-debu furak ida. Iha bee-debu ne’e nia laran, oan sira hoku lisuk. Iha bee-debu ne’e nia laran mak oan  sira hahú hetan matak-malirin.

Atambua-Dili, 30 Dezembru 2015

@ JE/ABS/KM